“ጸሎት እና አምልኮ” የተባለው ይህ መጽሐፍ፣ ሰው ከሚያስፈልገው እና ከሚፈልገው ነገር ሁሉ የእግዚአብሔርን ክብርና መንግሥት በማስቀደምና ትኩረት በመስጠት ስለሚኖረው የጸሎትና የአምልኮ ሕይወት የሚያስተምር ነው። እንዲህ በማስቀደምና እግዚአብሔርን በማክበር በሚኖረው አማኝ ውስጥ የሚያስፈልገው እንደሚሰጠውም በትኩረት ያስተምራል።

ትምህርቱ አማኝ የእግዚአብሔር ልጅ የመሆኑን እውነት በመግለጽ ይጀምራል። ልጅ እንደ መሆኑ ጸሎቱ እንደሚሰማ በማመን ወደ አባቱ ዙፋን ይቀርባል። ለኣባቱ ስም፣ መንግሥት እና ፈቃድ በነገር ሁሉ ቅድሚያ ይሰጣል። ይህንን አመለካከት በጸሎቱ ውስጥ ያንጸባርቃል። ከሁሉ በላይ የአባቱን ፈቃድ  ካስቀደመ በኋላ ገና ከመጠየቁ በፊት የሚያስፈልገውን ሁሉ ለሚያውቀው ለእግዚአብሔር የግል ልመናውን ያቀርባል።

ይህ መጽሐፍ ጸሎት ምን ያህል ከዕለት ኑሮአችን ጋር የተጋመደ እንደሆነ እንድናይ ይረዳናል። በጸሎት ትምህርት ቤት በየትኛውም ደረጃ ላይ ብንሆን ለሕይወታችን የሚያበረክተው አስተዋጽኦ አለው። የትኛውም አማኝና በየትኛወም መስክ ጌታን የሚያገለግል አገልጋይ፣ ይህን መጽሐፍ ቢያጠና ይጠቅመዋል። ይህን መጽሐፍ የሚያጠኑ ሕይወታቸውና አገልግሎታቸው ሁሉ እንዲያድግና በክርስቶስ አካል ውስጥ በቆሙበት ስፍራ ፍሬያማ አገልግሎት እንዲሰጡ ከልብ እንመኛለን።

ይህንን እና ሌሎች የመጽሐፍ ቅዱስ ትምህርቶችን በግልም ሆነ በኅብረት ማጥናት የሚፈልጉ ከታች በተሰጠው አድራሻ ሊጽፉልን ይችላሉ። መጽሐፍቱን በንዑስ ቡድን ውስጥ፣ በሥልጠና ፕሮግራሞች ላይ፣ በመጽሐፍ ቅዱስ ትምህርት ቤቶችም ውስጥ ለመጠቀም ይቻላል።